May mga benepisyo o policy na may malinaw na dahilan kung bakit para sa isang partikular na grupo. Ang pagkilala na may lehitimo silang pangangailangan ay hindi awtomatikong nangangahulugang balewala na ang pangangailangan ng iba.
Lehitimo ang magtanong ng “Paano naman kami?”, pero hindi sapat ang tanong para patunayang unfair ang hindi pagkakasama sa saklaw ng isang policy o benepisyo. Kung may sariling claim, kailangan pa ring maipakita kung ano ang pangangailangan, batayan, at merito nito.
Doon nagiging problema kapag bawat benepisyo o policy para sa iba ay kailangang agad ibalik sa sarili kahit hindi pa napapatunayang pareho ang sitwasyon o may sapat na dahilan para mapabilang din. Self-centered entitlement na iyon kapag ang pagiging patas ay sinusukat na sa kung kasama ba palagi ang sariling grupo, imbes na sa patas na paghusga sa bawat claim.
Patas ang paninindigan kapag kayang kilalanin ang merito ng iba habang pinapatibay ang sariling claim sa sarili nitong batayan.