Ang expert witness ay may malalim na kaalaman at kasanayan sa kanyang larangan na ginagamit sa pagsusuri at pagpapaliwanag ng ebidensiya. Hindi ito basta hula o personal na paniniwala. Kapag salungat sa sariling naratibo ang kanyang findings, hindi sapat na tawagin itong opinyon lang para balewalain ang kanyang expertise.
Puwedeng kuwestiyunin ang eksperto. Mahalagang malaman kung sapat ang kanyang kwalipikasyon, maaasahan ang ginamit na pamamaraan, at suportado ng ebidensiya ang konklusyon. Ang pagtanggap sa kanyang testimonya ay hindi nangangahulugang napatunayan na ang lahat ng konklusyon niya.
Hindi mali ang hindi pagsang-ayon sa eksperto. Ang mali ay ang paghamak sa kanyang kaalaman nang walang sapat na batayan, dahil lamang hindi gusto ang kanyang findings. Kapag kinikilala ang expertise habang pabor ang resulta, pero binabalewala ito kapag salungat, nagbabago ang pamantayan ayon sa sariling paniniwala. Hindi na ang kalidad ng pagsusuri ang pinagbabatayan.
Kung binabalewala mo ang findings ng eksperto dahil salungat ito sa paniniwala mo, at hindi dahil may problema sa kanyang pagsusuri, hindi patas na pagkuwestiyon ang ginagawa mo. Dobleng pamantayan iyon na dapat mong aminin at ituwid—hindi ipagtanggol na para bang may sapat kang batayan.